Skip to main content

Araba Euskaraz 2022 ate joka daukagu!

2022/06/16

“Aurtengo Araba Euskaraz inoiz baino parte-hartzaileagoa eta komunitarioagoa izango da”

Eider Olabe Armentia Ikastolako lehendakari ordea da, eta Araba Euskaraz antolatu duen talde eragilean buru-belarri aritu da lanean. Aurten, gainera, Arabako ikastolen jaia lurraldeko zortzi ikastolen artean antolatu dute, eta Olabek argi dauka abiapuntu horrekin lortu dena: “Aurtengo Araba Euskaraz inoiz baino parte-hartzaileagoa eta komunitarioagoa izango da”. 

Zortzi ikastolen arteko elkarlana antolatzea ez da gauerdiko ahuntzaren eztula izan, eta horregatik joan den irailean hasi ziren prestaketa lanetan: “Gure kasuan, eta Araba Euskaraz Gasteizen egingo zela ikusita, gunearen kudeaketa egokitu zitzaigun. Hiru gune dira, Pagoa, Haritza eta Ametza izenekoak, behar tekniko eta material ezberdinekin, eta guztia prestatzen aritu gara”.  

Ekainaren 19ari begira lan egiten den arren, urte osoan zehar elikatu beharreko proiektua da Araba Euskaraz-ena, eta horregatik bi azpitalde sortu zituzten Armentia Ikastolan, “ bat espazioen diseinua eta antolaketa egiteko, eta bestea urteko ekitaldiak garatu eta aurrera eramateko”. Gutxi gorabehera berrogei pertsona aritu dira lanean, zenbaki “esanguratsua” Eiderren ustez, “kontutan hartuta jendea bolondres lanetarako mugitzea zein zaila den”. Aste honetan ere, kopuru horren bueltan arituko dira muntaketa lanetan: “helburua argia da, guztiok apur bat egitea, gutxi batzuk dena egin behar ez dezaten”. 

Aurreikuspenen arabera, igandea bero handiko eguna izango da, baina Olabek zera azpimarratu du:  “ez gaitu bereziki kezkatzen, Olarizu leku zoragarria da, gune batetik bestera joatea erraza izango da, eta itzalgune asko daude”. 

Egitarauari dagokionez jai “herrikoia, euskalduna, eta familia guztiarentzako modukoa” prestatu dute antolatzaileek, eta horretarako hainbat ekitaldi antolatu dituzte: haurren basoa, erronkak, bertsolariak, musika… Denetarik aurkituko dute Pagoa, Haritza eta Ametza guneetara hurbiltzen direnek. Bitxikeria moduan Olabek mago “ibiltaria” aipatu du: “Ibiltaria da bere espektakulua leku jakin batean egin beharrean jendearengana hurbildu eta bertatik bertara egingo duelako, gu guztiok aho bete hortz utzita”. 

Laburbilduz: Olarizura hurbiltzen denak egunaz gozatzeko, Araban euskara bultzatzeko eta Trebiñuko Argantzun Ikastola laguntzeko mila modu izango ditu igande honetan.  

Zortzigarren alaba zain izango duzue igande honetan, irribarretsu eta gogotsu!

 

Irudia
p1g5n4b49h1mieesm155u1uge1je14.jpg
Irudia
p1g5n4b49if5s1u37e41qau1cgk5.jpg
Irudia
p1g5n4b49i13cq1k871lgl7nans76.jpg
Irudia
p1g5n4b49ibih1c131v8f1njeklv7.jpg

Azken albisteak

2024-03-22
Araba Euskarazek ekintza ezberdinak antolatzen ari da jai handia iritsi bitartean. Horien artean, duela bi urtetik hona egiten duten Arabako Ikastoletako 5.
2024-03-19
Euskadiko VII. Geografia Olinpiadan parte hartu dute ikastolako BATXI 2ko hamahiru ikaslek, lehen aldiz.
2024-03-18
Apirilaren 8tik 19ra bitartean izango da Batxilergoa egiteko matrikulazioa.